ఇలా కూడా

నీరెండ పడి
నీడలతో ఊగుతోంది నగర ఉద్యానవనంలోని
ఈ గాలి పూవు

దానిని పట్టుకుని
నీకు ఇద్దామనే ఆ పిల్లవాడి తపన అంతా

యిక చూడు
సీతాకోచిలుక వంటి గాలి వెనుక
రివ్వు రివ్వున పరిగెత్తుతాం
నేనూ ఒక చిన్న పిల్లవాడు
పోటీ పడి, రెక్కల్లేకుండా ఎగిరే కుక్కపిల్లలమై ఆ గాలి బంతి చుట్టూ-

యిక చూస్తావు నువ్వు
చిరునవ్వుతో కూర్చుని
క్షణికాలపు ఆ అనంతమైన దృశ్యాన్నీఆనందాన్నీ
అరచేతిలో ముఖాన్ని వాల్చుకున్న
ఈ సాయంత్రపు కనకాంబరపు పూల కాంతిలో-

---యిక ఆ వర్షపు రాత్రిలో
కొవ్వొత్తి కాంతిలో మనం
అన్నం తినే వేళల్లో
అడుగుతాడు కదా
మన పిల్లవాడు- 'అమ్మా

ఇందాక మనం తెచ్చుకున్న
పూవు ఎక్కడ ఉంది?'