నాక్కొంచెం మొడితనం ఎక్కువ!

నాక్కొంచెం మొడితనం ఎక్కువ! ఎందుకుండకూడదు? నేనెప్పుడూ నా సొంత విషయాలకోసం పట్టుబట్టను! ఒకటి కావాలి అని గాఢంగా కోరుకున్నానంటే.. అది ఖచ్చితంగా పదిమందికి మేలు జరిగేదే ఐయ్యుంటుంది! నాక్కొంచెం పొగరెక్కువ! ఉంటే ఉండనీ గాక? నేను పట్టుబట్టి సాధించిన గెలుపు నీడలో.. ఆదమరచి హాయిగా నిద్రపోతున్న వాళ్ళని.. చూసినప్పుడు గర్వంగా ఫీలవ్వడంలో తప్పేమిటి? నాక్కొంచెం అలోచన తక్కువ! ఐనా నష్టంలేదు! ఏళ్ళ తరబడి అలోచించి నాకు మాత్రం పనికొచ్చే.. పనులు చెయ్యడం కన్నా, తొందరపడి ముందుకు పడి.. అందరికీ పనికి వచ్చే పనులు చెయ్యడం మంచిదే కదా? నాక్కొంచెం తొందరపాటెక్కువ! చింతించాల్సిన పనేం లేదు! హడావుడి గా నేను నిర్ణయించుకున్న కొన్ని సందర్భాలు.. నష్టపెట్టిన దు:ఖం, లాభం పొందినవాళ్ళ సంతోషం కన్న తక్కువే! నాక్కొంచెం తింగరితనం ఎక్కువ! ఎవ్వరేం చెప్పినా వినను! మరేమీ ఫర్వాలేదు, జ్ఞానం పెంచుకుని చేతులుకట్టుకు.. కూర్చోవడం కంటే, తెలివిలేని పరోపకారాలే ఉత్తమం! చెప్పుకుంటూ పోతే ఇలాంటి నెగిటివ్ షేడ్ పాజిటివ్స్ ప్రతి మనిషిలోనూ ఉండి తీరతాయి నేస్తం! పోతే, పరిశీలన సమయంలో మనం నిజాయితీగా ఉండాలంతే!