అప్పుదాతా సుఖీభవ

దేశంలో కరువుందని కేంద్రం రాష్ట్రంలో కరువుందని రాష్ట్ర ప్రభుత్వాలు అగ్గొలు పెడతాయి కానీ, ఆ దేష, రాష్ట్ర ప్రజల జేబులకెంత కరువొచ్చిందో ఎవరికీ పట్టదు.... ఖర్చులకి సరిపడా పచ్చకాగితాలేక పస్తులుంటూ పైకి ఉపవాసమని చెప్పుకు తిరిగే ప్రజలెందరో మన చుట్టూ... ఇల్లు ఖాళీ అని బోర్డు పెడితే ఈగల్లా ముసిరే జనం కడుపు ఖాళీ అని బోర్డు పెడితే పక్కకి తిరగడానికి కూడా తలకి మనసొప్పదాయే.... పండగపూట పాయసం వండి పిల్లల కడుపు నింపాలనుకునే తల్లి... క్యూ కట్టి వచ్చే పండగల్లో ఏ ఒక్క పండక్కైనా కొత్త బట్టలు కొనాలనుకునే తండ్రి.... పిల్లల చదువులకి... చిల్లర సామాన్లకి ఇంటి కిరాయికీ ఇతరత్రా ఖర్చులకీ ఆధారపడేది "అప్పు" మీదే...!! నేటికీ చాలా ఇళ్ళల్లో ఇదే తంతు.... అడిగిన ప్రతివాడూ అప్పివ్వలేడు... ఆశ పెట్టుకున్న ప్రతివాడూ అవసరాలు తీర్చలేడు... కానీ... ఎవరో ఒక్కరుంటారు...! వడ్డీ వేసినా ప్రేమని వడ్డిస్తాడు... చుట్టం కాకున్నా, కష్టానికీ-మనకి మధ్యన అడ్డొస్తాడు... ఇప్పుడాకలి అవుతోంది పచ్చడి మెతుకులైనా పర్లేదు ఓ ముద్ద పెట్టండి అంటే, రేపురా బిర్యానీ పెడతా అనే బంధు మిత్రులెందరో మన భారతావనిలో...!! అలాంటి సందర్భాల్లో అప్పిచ్చిన వాడేగా మనకి దేవుడు...!! అందుకే నేనంటా, భక్తి ఉన్నోడికి ఒక్కడే దేవుడైతే... అప్పుచేసే వాడికి ఊరు ఊరంతా దేవుళ్ళే...!! తీసుకున్న అప్పు ముప్పుగా మారకముందే చెల్లించే సత్తా ఉంటే , పప్పుకూడేం ఖర్మ? పకోడీలు... పలావులే తినేయొచ్చు... పర్లేదు... లేదంటే, అప్పు - చాలా పెద్ద తప్పు...!!