గాలిపటాలెగరేస్తున్నారు పిల్లలు

గాలిపటాలెగరేస్తున్నారు పిల్లలు అదనుచూసి వదుల్తూ లాగుతూ లాగుతూ వదుల్తూ అందనంత ఎత్తుకు ఎదుగుతున్నారు పిల్లలు రంగురంగుల గాలిపటాల్తో ఆకాశంకేన్వాసుమీద విశ్వాసపు కుంచెలతో ఉత్సవంలాంటి జీవితాన్ని చిత్రీకరిస్తున్నారు పిల్లలు రెక్కల్ని నమ్ముకొని నిత్యం సముద్రాల మీద వలసపక్షుల్లా పొట్టకూటి ప్రయాణం చేస్తున్న జీవితాలు కొన్ని ఏ రెక్కలు లేకనే ఆకాశాన్నాక్రమిస్తున్న ధనిక మేఘాలు ఇంకొన్ని సుడిగాలికి ఎదురొడ్డి సాగుతున్న దిక్కులేని కూలీ తూనీగలు వేలకొద్ది ఆకాశం జీవితాలతో క్రిక్కిరిసింది గాలిపటాలెగరేస్తున్నారు పిల్లలు వాస్తవంలో జీవిస్తున్నారు పిల్లలు ఆకాశమంత జీవితానికి అవరోధాలెన్నున్నా అవధులెక్కడివి? అదిగో ‘బో’ వెయ్యడానికి, ‘కైంచి’ కొట్టడానికి, పదునైన ‘మాంజా’తో శత్రు పటాలు పావురాల్ని డేగల్లా వెంటాడుతున్నాయి పిచ్చుకలంత సులువుగా తప్పించుకుంటున్నారు పిల్లలు ఉత్తుత్తి భయాలకు బెదరమంటున్నారు జీవితపటాల్ని కాపాడి ఒడిసి పట్టుకుంటున్నారు అదిగో! పిల్లల విజయోత్సాహ పు హోరులో తుపాకీ శబ్దాలు కూడా చెవులు మూసుకుంటున్నాయి పడడం ,లేవడం తెగిపోవడం , అతుక్కోవడం చిన్నబోవడం, చిక్కు విడదియ్యడం పిల్లలక్కూడా సహజాతి సహజం మానవ చేతిసూత్రంపై జీవితం గాలిపటమై ఆడుతోంది ********** మరణించే ఆలోచనల్లో ఉన్నవాళ్ళకు పిల్లలు ఇలా సలహాలిస్తున్నారు “అంకుల్! ఒక్క గాలిపటం కొనుక్కోండి ప్లీజ్”