కవిత్వమెలావుండాలి

కవిత చూడగానే కొత్తపుస్తకం వాసనేయాలి చేతిలోకి తీసుకోగానే ద్రాక్షపళ్ళ గుత్తిలా నోరూరించాలి ముద్దాడగానే వాక్యం మల్లెపూల గబ్బలా మృదువుగా తాకాలి అమాంతం నోటిలో వేసుకునే పిప్పరమెంటులా ఉండొద్దూ.. కనీసం బండరాళ్ళమధ్య పారే సెలయేరులానైన ఉండాలిగదా లోపలినుండి పొంగి వచ్చే వరదను రిజర్వాయర్లలో ఆపగలిగే ఆనకట్టలా ఉండాలి కొండనైనా పిండిచేయగలమనే గుండెధైర్యాన్నిస్తూ భుజాన చెయి వేసి నడిచే స్నేహితునిలా ఉండాలి చదువుతున్న పాఠకుడి ఊపిరి వెచ్చదనానికి కరిగి గాయంపై రాసిన నవనీతమై మెరవాలి దుర్మార్గం పై వ్యక్తమయిన ఆగ్రహంలా ఉందాలి మొత్తంగ చెప్పాలంటే అన్యాయం ముంగిట్లో ఎగిరే ఎర్రజెండాలా ఉండాలి రెడ్డి రామకృష్ణ