రాత్రికొస్తా ..... రెడీగా ఉండు...!!

ఏమిటో, రాకపోతే రాలేదంటావ్ వస్తేనేమో వదలనే వదలవు ఇలాగైతే కష్టం సుమీ... వచ్చిన దగ్గరనుండి అదే పనా?? మరే పనీ చేసుకోనీకుండా... అని నన్ను నిందించొద్దు మరి నేనొచ్చాక ... సుఖమిచ్చాక... నీ మనసుకెంత హాయిగా ఉంటుందో తెలుసా?? అందుకే వేళ కాగానే వేచి చూడమనేది... పగటి పూట వచ్చినప్పుడు నీకిచ్చే సుఖం వేరు... అదొక రకమైన హాయి.. కానీ నన్ను నువ్వు ఎక్కువసేపు ఉండనిచ్చేది రాత్రి వేళల్లోనే కదా... రోజూ వచ్చినట్టే వస్తా కానీ.. దేనికో కలతపడి కూర్చుంటావు ఇక నేనొచ్చినా నీకేం సుఖం? నాకేం సుఖం చెప్పు? పట్టుమని ఒక రెండు గంటలైనా ఉండలేనప్పుడు... అందుకే, మనసు ప్రశాంతంగా ఉంచు నేనొచ్చాక నిన్నెంచక్కా మరో లోకానికి పట్టుకెళ్తా... మందేసి కూర్చుంటే ఆ మత్తులో ఉంటావు నేనొచ్చిన సంగతి కూడా గుర్తుపట్టలేనంత... ఇక నా విలువేముంది?? నేను నిద్రని... నువ్వు పిలిచినప్పుడు రాను నీ మనసు, శరీరం అలసినప్పుడు నా అంతట నేనే వస్తాగా... ఎటూకానివేళ అలా పిలవకు రాత్రికి కచ్చితంగా వస్తా రెడీగా ఉండు... (ఉదయం నుండి తెగ అలిసిపోయి ఉన్నా.. నిద్దురని రమ్మంటే రాకుండా నాకు చెప్పిన ముచ్చట్లివి... ఇప్పుడు తనొచ్చే వేళయింది... ఇక నేనుంటానే.... ఏదో అనుకుని చదివి నిరాశకి గురైన వాళ్ళతో పాటు, అందరికీ శుభరాత్రి..) - శతఘ్ని.... !! ( వినీల కాంతి కుమార్ )