ముళ్ళకు పూలు పూయించు

ముళ్ళకు పూలు పూయించు, భారతీ, ముళ్ళకు పూలు పూయించు... ముళ్ళ కళ్ళల్లో పరిమళాలు ప్రసరించు... మేం పెంచుకున్న కుక్కపిల్ల మా పాలిట దొంగ నక్క అవుతుంటే మేం నమ్ముకున్న దేవుడు మా బలి కోరే రాక్షసు డౌతుంటే కుక్కల్ని ఎలా పెంచను! దేవుళ్ళను ఎలా వేడను! అందుకే ఇపుడు మా చూపంతా... పులుల మీద, రాక్షసుల మీద, పులులూ రాక్షసులలాంటి పస గలిగిన ముళ్ళ మీద... మమ్మల్ని నిట్టనిలువునా ముంచుతా యనుకొన్న సుడిగుండాలకు గుండెల్ని ప్రసాదించు, భారతీ, సుడిగుండాలతో రసరమ్య వసంత గీతాలు పాడించు... చీకటి వెలుతుర్ని ప్రసవించేలా చూడు, భారతీ, చీకటి కళ్ళల్లోంచి వెన్నెలల్ని నడిపించు, చీకటి చేతుల్లోంచి సూర్య గోళాన్ని విడిపించు, చీకటి మనసులో ఉషోదయాలు పండించు... బండలకు మన సివ్వు, భారతీ, బండలను పూల చెండులుగా మార్చు, దండల్లాంటి మెత్తని దిండుల్లాగా మార్చు... పాముల కోరల్లో పాలు కూర్చు, భారతీ, పాముల్ని అమృతం పంచేలా తీర్చు, పాముల్ని దేవదూతలుగా మార్చు... కాలం ఉరితాడును పూల దండ చెయ్యి, భారతీ, కాలం పూల దండను మా మెడలో వెయ్యి, నువ్వన్నా మా కింత నమ్మకాన్ని మా మనస్సులో పొయ్యి, తెచ్చి మా నెత్తిన పెట్టుకున్న వాళ్ళను లాగి పారేసే ధైర్యాన్నియ్యి...